SAVEURS ED PICARDIE

Produits

Saveurs ed Picardie (Ches Gouts d’Ervasi) ch’est un.ne marque ed rassannage d’el région qu’ale est abudée par ech Consel Régionnal. Ale o été étampi in 1995 pou interloïer pi rinde pu fachile chele connissainche pi ch’départissage d’ches produits. Chele marque-lo a fait partie dech comité ed promocion Terroirs de Picardie.

Ches Gouts d’Ervasi ch’est un.ne marque qu’a rind possibe chl’erconnaissainche d’ches produits ed per-ichi qu’ont té foait pa dz’onmes d’éto. Ainsin, a peut foaire del conmunicacion pi del promocion dsu un.ne ganme ed produits diverchifiés pi qu’os n’déteupe equ per ichi.

Chu qu’i foait chele particularité d’chele marque ch’est qu’chl’agréemint i est kerké per ches produits et mie per ches interprises.

Vlo-chi ches critères à rimplir pou avoér el droét ed kerker ch’tite "Ches Gouts d’Ervasi" :

- chl’interprise a doét mie dépasser chinquante ouvreus

- ches matières premières a doétte evnir seurtoute ed Picardie

- chele qualité d’ches modes ed foaisage a doét ète warintie

- ech produit i doét raponne à un caïer d’kerkes préchis. Ech caïer d’kerkes i est éfourdri per “Terroirs ed Picardie”. Adon, i erbéïé ed près pi indossé per chele DRCCRD obin chele DSV

- ech produit i passe in coumission ed consintmint (juri d’onse gins) doù qu’i est noté dsu s’présintacion, sn’etnue, sin sintimint, es matière pi bin seur sin gout. Pou réussir chl’égardrie, i doét avoér un.ne note moéïenne qu’a fuche au moins égale à 12, obin i est erjté.

- quand qu’ech produit i est indossé per chele coumission ed consintmint, i doét coère ète analisé per un labouratoère apert-li coési per « Terroirs ed Picardie » dsu des critères déwillés din ch’caïer d’kerkes. Si qu’ches analises as sont boinnes, adon i peut avoér ch’consintmint « Ches Gouts d’Ervasi ».

Pou warantir qu’el qualité pi ch’gout dech produit is fuchtte wardés, chti-chi i est couramint gouté pi analisé.

* DRCCRF (Direction Régionale de la Concurrence, de la Consommation et de la Répression des Fraudes)
** DSV (Direction des Services Vétérinaires)

Traduction Olivier ENGELAERE (Ofiche Tchulturel Régionnal ed Picardie)