Ch’l’indjile
Ch’l’indjile alle est piérgée in Heute Sonme édpis 1383.
Pichon rondelet équ sin corps i l’est tout in londjeur, alle put pésier djusqu’à dux kilous. En l’prind avec ein bornion obin ein-ne foin-ne.
Chés piérges in bos is sont carpintés pa chés "pichon-niers d’ieu douche" d’élle Heute-Sonme, plachés à chés van-nes qu’en appalle dés rayéres pis i né n’a neu éd Sint-Christ-Briost à Bray-dsur-Sonme. Ch’l’indjile à s’dégusse fraique obin fémée, pis s’arringe éd pusieurs seuces..

Ech gohet és Soéssons
In 1590, ein moéne décrit ch’l’histoére d’élle rue d’chés favelottes, nom don-né à ein-ne rue éd Soéssons d’où qu’chés gohets is ’s’sont mutipiés in part eux, seuvant ainchi chés Soésson-nais conme par miraque d’élle famin-ne.
Au XVIIeume sièque, éch gohet éd Soéssons i l’est lonmé dins ein-ne inchycloupédie conme éch meilleux d’élle rache. In 1789, ein teste inglais i lonme chés grin-nes plaintachions éd gohets d’éch Soésson-nais pis au XIXeume siéque, Brillat Savarin i lue sés virtus.
Ech gohet éd Soéssons i s’ércon-not à s’pieue fourt fine pis à sin goût agréabe, i s’tchultive normalemint dsur ranme. I n’éziste bécoeup éd fachons d’él fristouiller.

Ech Marolles
La Picardie alle con-not ein éd chés formaches chés pus fanmeux éd Frainche : éch Marolles, por qu’est-che i n’a équ chés cafes éd Thiérache qu’alles rindent possibe éch déverloppemeint d’élle florecinche à part élle qu’alle li don-ne sin sintimint. Edpis él XIXeume siéque, chés histoériens pis cheutes qui savtent is s’accordtent por rappourter élle créachion d’éch formache-chi à chés moénes d’éch l’abbayie éd Marolles. Esse n’ourigine d’ein mille d’énées a n’est pos chertifiée par quite cose d’écrit. En n’sait érien d’élle périote d’où qu’élle confecchion d’éch Marolles l’a cminché à ête, mains en pérsuppose qu’alle a té arringée él long d’chés énées. Ech savoér-comint-fare d’chés formagers i l’est ércon-nu grâche à ch’l’AOC qui coron-ne éch formache-chi édpis 1986.

ech canèrd co-vért
Edpi des siécs in Bae d’Sonme, ch’o toudi étè l’poéyis d’chés moégneùs d’mér. Déjo cachès per chés hutteùs qui n’in foésoétent un éstra à leu condition d’piot ménageu.
Ech canèrd co-vért éd nos bassures i déchind d’ses rations seuvaches (ananas plat rygholos). O l-l’aléve au déhors du cotè d’Rue, in Sonme. Par rapport à o, à dateu d’ses 3 smain-nes il o eune mère à l’ieù à ses dispositions.
A dateu d’ses 2 mouos, o n’li foé pu mèngeu surtoute éq du bla.
Tuè dins les 13/15 ésmain-nes, és vian-ne al est fin tèr, d’un jus pi d’eune saveur du diabe.
Comme est spécial qu’i fuche alvè à sins, i n’arrive à l’age qu’aveu ch’boin temps, dusqu’à l’apréseut. Graissiè à 2 pieutes o bien 2 grosses lives

éch coéchon "no téons".
Naturél à foé, éch coéchon "no téons" il est alvè su s’litiére éd feure  pi graissiè d’chés smisons d’chés camps, du meume péré q’nos téons d’leu temps.
Dé ch’sins lo, a li baille eune vian-ne éd couleur si bélotte, d’un jus pi d’eune saveur du diabe, qu’o s’in raminteu toudi.
A savoér étou qué ch coéchon "no téons".il est éspécialemint picard. Pi por n’in définir, qu’il est sui long in bout dé s’vie et pi qué sn’alvage il est adjincè aveuc gramin du soin à n’point gadrouilleu no poéyis picard.