BINVNUE A L'CINSE

Ches tchultivateurs qu’is ont din l’idée ed foaire sékant d’activiteus din leu cinse, is coéssistte ed s’achuchonneu à "Binvnue à l’cinse" pour afin qu’os ayèche un.ne assurince ed qualiteu poi pour qu’os fuchièche çurtain d’ète bin rchu.
Is décidtte ed respecter ches règues mertcheu din l’chèrte ed qualiteu "Binvnue à l’cinse" pi is acceptte étou qu’ches gins del "commission d’agrément et de contrôle de la Chambre d’Agriculutre" is vienchtté l’zes mileu.

Chu cinsieu i mettra, bien à vu, un.ne tiote pankerte dsus sin pothuis aveuc ch’tiot dessin del merque.

 

Ches cinses auberge

Ches cinsieus cabartiers is ont hanseu dsus leu exploétacion un.ne sale à mieu. O sroait fin bien rchu, pis tout s’qu’os minjreu a vienra del cinse, sinon is vous diront éddoù qu’cha vient.
O n’minjreu qu’des rchètes ed per ichi.
Ches cinses auberges is sont overtes à tertous mais i feura l’dire à l’avainche. A mzure, des keups, os pourreu coère coutcheu amon d’ches gins.

 

Ches cinses à gveus

Ches cinses à gveus, ch’est d’esploétacion doù qu’os peut monteu à bidet. Aladon, os peut coère y mieu obin y coutcheu. Ch’est slon ches gins.
I eu des proumenades, os peut aprinde ou s’mète in pinsion. Est foait pour chétleus qu’is saitte obin nan.

 

Ches cinses à resteu

Ches cinses à resteu, est foait pour coutcheu, mingeu, obien coère s’éjueu.

Os poreu profiteu del nature pis d’gramint d’amusemints. Est foait pour sékant d’gins al foés, pour qu’a fuche un molé pu familiale.
Os y mainjreu d’espécialiteus d’ichi.

 

Ches "campings" din ches cinses à rchuvoér

Os y perpose ed déteupeu chl’esploétacion pis ches poaïsans. Ches djeulus is sront à leu afoaire, pisqu’is pouront acater des produits del cinse.

Est régleminté : vingt-chonq plaches, point d’pusse, pour un.ne surfache d’troés chints mètes tcharré chaque.

 

Rchinage al cinse

Os sreu rchu par ech cinsieu pour rchineu aveuc, bien intindu, ches produits del ferme.
Apreus, os pourreu coère alleu ranseu dsus sn’esploétacion.
Rchninage pis keup comprins. A sra donneu interdeus 3 h pis 6h d’ermontée. Des keups, a peut s’foaire d’ervant-nonne.

 

Produit del cinse

L’boutique "produit del cinse", ch’est un indrouot adoù qu’chu cinsieu i vous vindra ç’qu’i a foait din sn’esploétacion, pis à mzure din d’eutes cinses certifieu.
Ch’producteur i vous assure étou qu’tout ç’qu’i vind ch’est boin pis qu’i sra aimabe aveuc vous.
Os rchuvreu tout plein d’idées pi d’consels pour foaire tchuire chu qu’os acatreu.

 

Ches cinses ed déteupage

Ches cinsieus is vous front foaire el tor d’leu esploétacion pour qu’os comprinche quoé qu’ch’est qu’un.ne cinse, cmint qu’a torne, ches gins, pis l’nature alintour.
Ches visites djideu is sont foaites pour ches tiots ou nan, tout seu ou in ho.

 

Ches cinses pour aprinde

Is sont foaites pour ches moucrons pis ches pus vius, durant qu’is sont à l’école ou din leu chinte ed loésir. Is perpostte ed foaire sékant d’keuses aveuc ches cinsieus, pour qu’is comprinchtte cmint qu’ale est hanseu un.ne cinse, quoé qu’ch’est qu’el tchulture, pis étou, à mzure, chl’invironnmint.
Dins tout ches cinses à aprinde certifieu, is saitte quoé. Pis leu idée as sont indjinceus conme i feut.
Ches cinses à aprinde, ch’est étou des cinses ed déteupage.